ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ກົມລ້ຽງສັດ ແລະ ການປະມົງ, ກົມສົ່ງເສີມກະສິກຳ ແລະ ສະຫະກອນ ແລະ ບໍລິສັດ ກຣີນຟີດ ລາວ ຈຳກັດ

ພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບ ການຮ່ວມມື ເພື່ອການຍົກລະດັບຜະລິດອາຫານສັດໃຫ້ເຂັ້ມແຂງ ຕາມທິດການຜະລິດເພື່ອທົດແທນການນໍາເຂົ້າ ຕາມສະພາແຫ່ງຊາດຮັບຮອງເອົາ ການຜະລິດອາຫານສັດໃຫ້ສາມາດສະໜອງອາຫານສັດພາຍໃນໃຫ້ໄດ້ 70% ຂອງຄວາມຕ້ອງການໃນປີ 2023 ຕິດພັນກັບການຜະລິດອາຫານສັດໃຫ້ເຕັມຄວາມອາດສາມາດຂອງເຄື່ອງຈັກ ການສະໜອງວັດຖຸດິບ ໃຫ້ແກ່ບັນດາໂຮງງານຜະລິດອາຫານສັດໃນ ສປປ ລາວ, ໃນວັນທີ 27 ທັນວາ 2023, ທີ່ບໍລິສັດ ກຣີນຟີດລາວ, ເຂດນິຄົມອຸດສາຫະກໍາໂນນທອງ, ເມືອງໄຊທານີ, ນະຄອນ ຫຼວງວຽງຈັນ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບ ການຮ່ວມມື ການຍົກລະດັບຜະລິດອາຫານສັດ ແລະ ການສະໜອງວັດຖຸດິບ ໃຫ້ແກ່ໂຮງງານຜະລິດອາຫານສັດ ລະຫວ່າງ ກົມລ້ຽງສັດ ແລະ ການປະມົງ, ກົມສົ່ງເສີມກະສິກໍາ ແລະ ສະຫະກອນ ແລະ ບໍລິສັດກຣີນຟີດລາວ. ຈຸດປະສົງເພື່ອ: (1) ຍົກລະດັບຜະລິດອາຫານສັດໃຫ້ເຂັ້ມແຂງ ຕາມທິດການຜະລິດເພື່ອທົດແທນການນໍາເຂົ້າ ຕາມສະພາແຫ່ງຊາດຮັບຮອງເອົາ ການຜະລິດອາຫານສັດໃຫ້ສາມາດສະໜອງອາຫານສັດໄດ້ 70% ຂອງຄວາມຕ້ອງການ, (2) ຜະລິດວັດຖຸດິບ ສາລີ, ມັນຕົ້ນເພື່ອສະໜອງ ໂຮງງານຜະລິດອາຫານສັດ, (3) ຊຸກຍູ້ ສົ່ງເສີມ ການສ້າງ ກຸ່ມ, ສະມາຄົມ ຜູ້ຜະລິດວັດຖຸດິບອາຫານສັດ ແລະ ເຮັດສັນຍາຜູກພັນ 2 ສົ້ນ ທີ່ໄປຕາມກົນໄກການຕະຫຼາດ ກັບຜູ້ປະກອບການຜະລິດອາຫານສັດ ໂດຍມີພາກລັດເຂົ້າໄປມີສ່ວນຮ່ວມ. ໃຫ້ກຽດລົງນາມໃນບົດບັນທຶກຄວາມເຂົ້າໃຈໃນຄັ້ງນີ້ ຕາງໜ້າ ກົມລ້ຽງສັດ ແລະ ການປະມົງ ລົງນາມໂດຍ ທ່ານ ປອ ກາວີພອນ ພຸດທະວົງ ຫົວໜ້າກົມກົມລ້ຽງສັດ ແລະ ການປະມົງ; ຕາງໜ້າ ກົມສົ່ງເສີມກະສິກໍາ ແລະ ສະຫະກອນ ລົງນາມໂດຍ ທ່ານ ສົມພອນ ແກ້ວຫາວົງ ຫົວໜ້າກົມສົ່ງເສີມກະສິກໍາ ແລະ ສະຫະກອນ, ຕາງໜ້າບໍລິສັດກຣີນຟີດລາວ ລົງນາມໂດຍ ທ່ານ ຮ່າວ ຮວ່າງ ຫງອກ ຜູ້ອຳນວຍການ ບໍລິສັດ ກຣີນຟີດລາວ. ຊຶ່ງມີ ທ່ານ ຮອງຫົວໜ້າກົມ, ຫົວໜ້າພະແນກ, ຫົວໜ້າສູນ ພ້ອມດ້ວຍວິຊາການ ຂອງສາມຝ່າຍ ເຂົ້າຮ່ວມເປັນສັກຂີພິຍານໃນຄັ້ງນີ້ດ້ວຍ.